Husay at Talino ni Pres. Jose P. Laurel, kinilala sa Komemorasyon ng Ika-133 Anibersaryo ng kapanganakan nito!

Bilang pag-alala ng Pamahalaang Lungsod ng Tanauan sa husay at talino ng isa sa Tanaueñong Bayani na ating maituturing, personal na nag-alay ng bulaklak ang sina Mayor Sonny Perez Collantes, Congresswoman Ma. Theresa “Maitet” V. Collantes, at pamilya Laurel sa bantayog ni Jose P. Laurel sa Ancestral House nito.

Bukod dito, nakiiisa rin ang mga miyembro ng Sangguniang Panlungsod at mga kinatawan ng iba’t ibang samahan sa Lalawigan ng Batangas. Habang nagpaabot din ng bulaklak ang mahal na Pang. Bongbong Marcos na kinatawanan ni Cong. Maitet Collantes.

Sa mensahe ni Mayor Sonny, kaniyang kinilala ang malaking kontribusyon ni dating Pangulong Laurel at ang pamilya nito sa paghahatid ng dekalidad na edukasyon sa ating mga kababayang Tanaueño. Aniya, ang kaniyang legasiya ang isa sa maituturing nating inspirasyon upang mas lalong paunlarin ang Lungsod ng Tanauan.

Habang ayon naman kay Congw. Maitet Collantes, isang karangalang maituturing ang kabayanihan ni Pres. Jose P. Laurel lalo’t isa ito sa naninindigan sa pagtataguyod ng dignidad, kapakanan at karapatan ng mga mamamayang Pilipino.

Samantala, nagpaabot naman ng pasasalamat ang Pamilya Laurel sa patuloy na pag-alala ng Lungsod ng Tanauan sa kanilang Lolo Jose sa pangunguna ni Mr. Francis Laurel at dating Congressman at Ambassador Mr. Macario Laurel.

Muli, nawa’y ang araw na ito’y magsilbing paalala sa bawat isa na minsa’y isang may prinsipyo at taal na taga-Tanauan, ang nanguna upang ipagtanggol at ipaglaban ang magandang bukas ng bansang Pilipinas.

Mabuhay ang ating dating Presidente Jose P. Laurel!

Mabuhay ang Lungsod ng Tanauan!

At mabuhay ang Inang Bayang Pilipinas!